Andlit hans vit skulu sjá

    Orð og lag: Norman J. Clayton
    Týtt: Øssur Berghamar

    1. Andlit hans vit skulu sjá
    skjótt ein gyltan morgun.
    Tá hvør skuggi svinnur,
    sálin hvílu finnur.
    Sorgin er til gleði vend,
    eingin neyð og pína.
    Horvin brátt
    myrka nátt,
    tá vit síggja hann.

    2. Harrin turka skal hvørt tár
    skjótt ein gyltan morgun.
    Skeiðið her er runnið,
    og á mál er vunnið.
    Eingin eymkan, suff og sút
    kennist í tí landi.
    Endað stríð
    alla tíð,
    tá vit síggja hann.

    3. Eingin skilnaður er meir
    skjótt ein gyltan morgun.
    Undurfulla løta
    vinum aftur møta.
    Og eitt fagurt fagnaðarlag
    Himmalin skal fylla.
    Stund so sæl,
    alt er væl,
    tá vit síggja hann!

    Allan vegin hann meg leiðir

    Orð: Fanny Crosby
    Lag 1: J.C. Bitthauer
    Lag 2: Robert Lowry
    Týtt: Petur William Háberg

    1. Allan vegin hann meg leiðir;
    kann eg ynskja meir enn tað!
    Kann eg ivast um hans kærleik,
    sum meg leiðir dag um dag!

    2. Himmalsk hvíld er við hans hjarta,
    sjálvt tá stormar ýla mest;
    tí eg veit, hvat enn mær hendir:
    Tað, sum Jesus ger, er best!

    3. Allan vegin hann meg leiðir,
    hann mær gevur lívsins breyð,
    gevur kraft til hvørja mótgongd,
    troyst í sorg og hjálp í neyð!

    4. Tá eg troyttur mangan snávi,
    og tá tostin plágar meg,
    fløðandi úr lívsins kletti
    gleðistreymar finni eg!

    5. Allan vegin hann meg leiðir;
    men hann elskar meir enn tað:
    Ævig hvíla mær er lovað
    heima í hans ljósa stað.

    6. Tá so síðsta stig er stigið,
    farið er alt myrkt og kalt,
    ævigt glaður skal eg sanna:
    Jesus leiddi gjøgnum alt.

    Var tað fyri meg, bert fyri meg

    Victor Danielsen
    Orð: John M. Whyte
    Lag 1: John M. Whyte
    Lag 2: Arthur Henry Mann
    Týtt: Victor Danielsen
    Upprunaheiti: Was it for me?

    1. Var tað fyri meg, bert fyri meg,
    at Jesus gekk hin tunga veg
    og sligin, tornakrýndur varð –
    var tað fyri meg, hann krossin bar?

    Niðurlag: Ja, fyri meg, alt fyri meg –
    áh, stóri ríki kærleiki!
    Eg lovsong syngja vil til tín,
    tú doyði, Jesus, Kongur mín!

    2. Var tað fyri meg, hitt boð so gott,
    sum einglar bóru hina nátt:
    Nú føddur er ein Frelsari –?
    Takk Harri, ja, tað var fyri meg!

    3. Var tað fyri meg, hann græt og bað,
    var tað fyri meg, hann lá á knæ
    ta nátt har í Getsemane –
    tann kvøl? Ja, ja, tað var fyri meg!

    4. Var tað fyri meg, hann boygdi seg
    á krossinum? Ja, fyri meg
    hin reyði streymur rann frá tær,
    tað var fyri meg, tú doyði har!

    Leið meg, áh, Gud! Tú hjálparleysan sært meg

    Fanny CrosbyVictor Danielsen
    Orð: Fanny Crosby
    Lag: Hupert P. Main
    Týtt: Victor Danielsen

    1. Leið meg, áh, Gud! Tú hjálparleysan sært meg,
    eg aldri beint kann ganga uttan teg;
    leið meg, áh, Gud! Tí tá eg eri tryggur,
    á tínum vegi einki sakar meg.

    2. Leið meg, áh, Gud, og drag meg nærri til tín,
    til tín, mín kraft, mín borg, mín hvíld, mítt alt!
    Leið meg, áh, Gud, lat meg ei burtur villast,
    statt tú mær nær sum altíð, tá tað galt!

    3. Leið meg, áh, Gud! So skjótt meg myrkrið villir,
    um ei títt andlit lýsir á mín veg;
    men tá í trúgv tess strálur greitt eg síggi,
    áh, hvør ein hvíld og gleði fyllir meg!

    4. So tryggur eri eg, inntil tú kemur
    og tekur heim tín dýrakeypta flokk,
    ja, tryggur, inntil stríðsins tíð er liðin,
    og inntil tá tín náði er mær nokk!

    Sæl er mín sál nú og alla tíð

    Orð og lag: Charles E. Moody
    Týtt: Petur William Háberg

    1. Sæl er mín sál nú og alla tíð,
    hvílir við krossins fót,
    Jesus gav hjarta mínum frið,
    frelsu og sálarbót.

    Niðurlag: Sæl er mín sál,
    sæl allar ævir,
    sæl er mín sál,
    hvílir við Kristi kross.

    2. Sæl er mín sál – myrkrið svunnið er,
    bondini eru loyst.
    Tyngda sál, kom og fá í dag
    frelsu og frið og troyst!

    3. Sæl er mín sál – hvør ein stund, sum fer,
    ber mót tí ljósa stað.
    Sorg og stríð – alt er burtur tá,
    undurfult verður tað!

    Er Jesus nær, tá mín sál er sjúk

    Orð: Frank E. Graeff
    Lag 1: J. Lincoln Hall
    Lag 2: Bárður á Lakjuni
    Týtt: Victor Danielsen
    Upprunaheiti: Does Jesus care

    1. Er Jesus nær, tá mín sál er sjúk,
    so at songurin tagna má,
    tá ið mótið svann,
    tá ið grátur rann,
    og eg veit ei veg ella ráð?

    Niðurlag: Áh, ja, hann er nær,
    eg veit, hann er nær,
    hans eyma hjarta er rørt!
    Tá ið náttin long er,
    og leiðin trong, er
    við hjálp hans armur nær.

    2. Er Jesus nær, tá ið nátt er myrk,
    og yvirhond ræðslan vann,
    tá á trongu kós
    ikki sæst eitt ljós,
    meðan ódnin ýlir – sær hann?

    3. Er Jesus nær, tá eg veik og fall
    fyri freisting, eg stríddi mót?
    Sær hann míni tár,
    míni djúpu sár,
    vil hann styðja snávandi fót?

    4. Er Jesus nær, tá eg havi mist
    tað, á foldum mær dýrast var?
    Er hann tá ein borg
    í tí djúpu sorg,
    elskar hann meg tá, er hann nær?

    Eitt navn er yvir øllum øðrum nøvnum

    Orð og lag: Allan Törnberg
    Týtt: Petur William Háberg

    1. Eitt navn er yvir øllum øðrum nøvnum,
    tað, sum Gud til frelsu gav;
    tað navnið sungið er um allan heimin,
    yvir land og yvir hav.

    Niðurlag: Himmalsk glæma er um navnið Jesus,
    tað navnið, sum av øllum ber,
    tí einki annað navn kann frelsu geva –
    einki navn sum Jesus er.

    2. Sum morgunstjørnan lýsir navnið Jesus,
    gjøgnum myrku syndanátt;
    tað gevur mót og birtir vón í vanda,
    veitir veikum sálum mátt.

    3. Tað ber ein sælan frið til kvølfult hjarta,
    ger, at lívið verður ljóst;
    hvør bylgja legst, og hvør ein stormur tagnar,
    sum kann øsa upp mítt bróst.

    4. Tá hvørt eitt navn so einaferð skal hvørva,
    navnið Jesus standa skal;
    tað undurfult skal lýsa allar ævir
    yvir song og hørpuspæl!