Ein stórur skari við Guðs trónu stendur

    Orð: Kjartan Staksund
    Lag: Ein dag skal ævinleikans morgun rísa

    1. Ein stórur skari við Guðs trónu stendur
    í hvítum búna, pálmagrein í hond;
    tey løgdu seg í Guðs várs faðirs hendur,
    tí lendu tey á Himna føgru strond.

    Niðurlag: Óteljandi er hesin frelsti skarin,
    sum heim er komin hesum foldum frá;
    frá vinum elskaðum tey eru farin,
    til tess at vera Faðir sínum hjá.

    2. Á Himni høga gleði, sæla valdar,
    ei sjúka, sorg og tregi níva har;
    tey heima eru ævinnar ótaldar,
    tí Jesus allar syndir teirra bar.

    3. Tey lovsang syngja um Guðs stóru náði,
    at Hann tey frelsti her í óndu verð;
    har er ei nøkur freisting, nakar bági,
    tey ævigt njóta Jesu sáttargerð.

    4. Kom tí mín vinur, bjarga tær frá deyða,
    nú meðan náðitíð tú hevur her;
    teg tváa lat í Jesu blóði reyða,
    tað einans móti Lívsins Landi ber.

    5. Ei lívið her á foldum við skal vara,
    skjótt kallar Guð teg burt úr hesi verð;
    skalt tú tá vera við í frelsta skara,
    so mást tú frelstur longu verða her.