Tað er nakað í Himli hjá børnum at fá

    Orð: Lina Sandell
    Lag 1: Ralph E. Hudson
    Lag 2: Andrew Thomsen
    Týtt: Victor Danielsen
    Upprunaheiti: Det blir något i himlen för barnen att få

    1. Tað er nakað í Himli hjá børnum at fá,
    tey, sum elska sín frelsara her;
    bæði krúnur og gullhærpur fáa tey tá,
    og ein klædning, sum snjóhvítur er.

    Niðurlag: Har er nakað at fá, har er nakað at fá,
    har er nakað hjá børnum at fá;
    í tí himmalska stað eru øll altíð glað,
    har er nakað hjá børnum at fáa.

    2. Tey á gullgøtum ganga og syngja so glað,
    millum einglar í ljósinum har;
    Jesus sjálvur er hjá teimum, minnist til tað,
    hann, sum syndir og straff teirra bar.

    3. Har við borðið hjá Gudi, har sita tey øll,
    fáa nýtt vín og livandi breyð;
    Harrin Jesus er ljós í tí himmalsku høll,
    eingin pína er har, eingin neyð.

    4. Ja, tey fáa sær vatn av tí livandi flóð,
    eta fruktir av lívstrænum við,
    og um Jesus tey syngja eitt gleðiligt ljóð,
    og hann gevur teim ævigan frið.

    Gud, tú gavst tín Son at frelsa meg

    Orð: Zacharias Zachariassen
    Lag (ørindini): Howard L. Brown
    Niðurlag (tillagað): Victor Reid

    1. Gud, tú gavst tín Son at frelsa meg,
    sendi hann til Golgata.
    Skuldarfríur har hann sligin varð
    fyri meg, ein syndara.

    Niðurlag: Er tað satt, tú doyði fyri meg,
    at til Golgata tú fórt:
    Einki offur, eg kann ofra tær,
    Harri Jesus, er ov stórt!

    2. Ábraham var lýðin hinaferð,
    sjálvt at ofra tær sín son.
    Jesus lýðin gav upp sína sál,
    knúst og deyðadømd varð hon.

    3. Jesus, tú teg sjálvan ofraði,
    gavst títt besta fyri meg.
    Skuldi eg tá ikki givið nú
    alt mítt besta fyri teg?

    Niðurlag: Tað er satt, tú doyði fyri meg,
    út á Golgata tú fórt!
    Tí er einki, sum eg ofra kann,
    Jesus, fyri teg ov stórt!

    Um her vit allan heimin kunnu eiga

    Victor Danielsen
    Orð: Nils T. Breiung
    Lag: Ókendur
    Týtt: Victor Danielsen

    1. Um her vit allan heimin kunnu eiga
    og góðs og stórar jarðir burtur leiga,
    hvat er tað alt tó uttan tap og skarn
    ímóti tí at vera eitt Guds barn!

    2. Basúnin síðsta einaferð skal ljóða;
    tá síggjast skal, hvør valdi lutin góða;
    tá Kristi flokkur treystur standa kann,
    men neyð og ræðsla hini grípa man.

    3. Tá sól og máni út úr støðu vikast,
    og jørð og himmal út við skundi strikast,
    tá vera heimsins stóru illa hýrd,
    tí tá skal brenna teirra ogn og dýrd.

    4. Eitt heim eg eigi hátt í Himmalsølum,
    eg fari skjótt úr hesum táradølum,
    og tó at bylgjan brýtur hátt um stavn,
    eg lendi skjótt tó í tí tryggu havn.

    5. Mær Jesus atgongd vann til staðin fríða,
    og skjótt so skal eg inn um portrið stíga,
    og tá ið fyrst eg komin eri har,
    eg gloymi skjótt alt stríð, á foldum var.

    6. Og um eg her skal lítil, armur vera,
    skjótt skal eg lívsins hvíta klædning bera;
    lat heimin søkja hetta, sum er smátt!
    Er Jesus mín, er alt í ævir gott.

    Ein blóðig hond nú bankar

    Orð: Johnson Oatman
    Lag: J. Howard Entwisle
    Týtt: Victor Danielsen

    1. Ein blóðig hond nú bankar
    á tínar hjartadyr,
    hon bankar í dag og troyttast ei;
    tað Jesus er, sum bankar
    og enn um atgongd spyr,
    tó mangan tú hevur svarað nei.

    Niðurlag: Áh, hoyrir tú hann kalla
    og banka hjá tær?
    Hans gjøgnumstungna hond bankar nú;
    við friði inn hann kemur,
    um bert hann fær eitt svar,
    og frelstur frá synd tá verður tú.

    2. Hvør mangan, tá tú veikur
    á sjúkralegu lást,
    hitt kall fylti tína sál við frykt!
    Og tá á náttarvøku
    tú greiðari alt sást,
    tú skilti, títt hús stóð ei so trygt.

    3. Og tá tú niðurboygdur
    við opnar gravir stóð,
    hvør bankaði Harrin ikki tá!
    Tá ævinleiki, deyði
    við ræðslu sinnið sló,
    tú segði: Eg dyrnar opna má!

    4. Hví letur tú hann banka
    og gevur ikki svar!
    Hann nátt tína venda kann í dag;
    hin naglamerkta hondin
    skal frelsu bera tær;
    lat upp tí og svara honum ja!