Kærleiki – trúfesti heim og hjúnalag fylli

    Orð: Øssur Berghamar
    Lag: Richard Charles Rodgers (Edelweiss)

    1. Kærleiki – trúfesti
    heim og hjúnalag fylli.
    Trygd í lund –
    stund um stund –
    lívsleið tykkara gylli.
    Orðsins barlast í sál og sinn
    tykkum góð vil vera.
    Ljós so bjart –
    nær og fjart –
    orðið uppi vil bera.

    2. Kærleiki – trúfesti
    framtíð tykkara myndi.
    Andans glóð,
    megi góð
    merki hjørtu og lyndi.
    Leiði tykkum um lívsins hav
    Harrans hond og megi.
    Ferðin sæl
    gerast skal
    – vard í sorg sum í gleði.

    Hann gevur meir náði, tá byrðarnar tyngjast

    Orð: Annie Johnson Flint
    Lag: Hubert Mitchell
    Týtt: Meta av Fløtum (ørindini) og Øssur Berghamar (niðurlagið)
    Upprunaheiti: He giveth more grace

    1. Hann gevur meir náði, tá byrðarnar tyngjast,
    hann styrkir enn meir, tá ið tung gerast stig.
    Er kreppan enn stór, er hans miskunn enn størri;
    um royndirnar økjast, hann økir sín frið.

    Niðurlag: Guds náði er botnleys, ómáldur hans friður,
    og aldri hans megi kann svinna avstað;
    tí av sínum veldigu, ævigu skattum
    hann gevur og gevur og gevur hvønn dag.

    2. Tá vit eru ovbyrjað, orka ei meira,
    útlúgvað og gevast á hálvari leið,
    ei ment eru longur í stríðnum at standa,
    Gud styrki tá sendir, hann svíkja kann ei.

    Hvat kann heimurin tær geva

    Orð og lag: Øssur Berghamar

    1. Hvat kann heimurin tær geva, ungi vinur,
    tú, sum eftir lívi, lukku leita man?
    Eftir stuttleika og spenningi tú strembar,
    men er hjartað vorðið trygt í tí, tað fann?
    Kanst tú hyggja fram mót hvørjum nýggjum degi,
    óttaleysur ganga fram hvørt lívsins stig?
    Á, eg spyrji: “Hvat kann heimurin tær geva,
    hevur hann tær givið nakran sannan frið?”

    Niðurlag: Nei, einans Jesus, hann kann geva sanna gleði, lív og frið
    og kann birta ljós í tíni myrku sál.
    Kom til hann, og tú skalt kenna, at hann er við tína lið
    og trygt teg føra vil á mál.

    2. Hvat kann heimurin tær geva, ungi vinur?
    Einans vónbrot, sorg og sút hann veitir tær.
    Mangur ungur, sum av honum læt seg blinda,
    syrgin mátti sanna, at hann svikin varð,
    men um tú tær venda vilt til Harran Jesus,
    hann skal frelsa teg í hesi somu stund,
    og ta gleði, sum títt hjarta tráar eftir,
    tú frá honum fáa skalt í lív og lund.

    Niðurlag: Tí einans Jesus, hann kann geva sanna gleði, lív og frið
    og kann birta ljós í tíni myrku sál.
    Kom til hann, og tú skalt kenna, at hann er við tína lið
    og trygt teg føra vil á mál.

    Eg havi Kristi kærleik

    Orð og lag: O.A. Lambert og Johnnie Hope
    Týtt: Øssur Berghamar

    1. Á Golgata, har Jesus leið deyðan fyri meg,
    hann gav sítt lív so heilagt, og friðin eigi eg.
    Nú syngi eg um hann, sum drakk ta beisku skál,
    so eg fekk Kristi kærleik í mína sál.

    Niðurlag: Eg havi Kristi kærleik í míni sál,
    :,: í míni sál, :,:
    og hann er øll mín gleði, mítt lív, mítt mál,
    tí hann livir jú í míni sál.

    2. Og um teg syndin freistar, og veikur tú tá ert
    tá minst, hans eyga vakir, hann veit um tað, tú gert.
    Á, bið hann tá um kraft, er gøtan myrk og hál,
    so kennir tú hans kærleik í tíni sál.

    Heilur, tú, sum øllum ræður

    Orð: Nikolai Frederik Severin Grundtvig
    Týtt: Øssur Berghamar

    Heilur, tú, sum øllum ræður,
    Frelsari og millummaður.
    Heimurin at tær vil søkja,
    fegin tó eg vil meg krøkja
    til tín kross og fylgja tær.

    Hvat sást tú í Himmalhøllum
    tó í mær og okkum øllum,
    at tú fórt av ljósins hæddum,
    birtir vón í sálum ræddum,
    komst at geva okkum lív?

    Men mítt hjarta, treiskt og tregið,
    mangan køvir mína megi.
    Lítið gott í mær man vera,
    hvat kann eg tær, Harri, bera
    aftur fyri kærleik tín?

    Tú, sum lívið hevur givið,
    gev, at eg av sonnum livi,
    so tú fyllir sál og sinni,
    ert í huga og í minni
    lív mítt alt og longsil mín.

    Men sum blóman má eg følna,
    hond og hjarta skulu kólna.
    Tó, um dagar munnu fækka,
    deyðan skal eg ikki smakka,
    tú tókst mína syndaskuld.

    Krossins boðskapi eg trúgvi.
    Takk, at skjótt hjá tær eg búgvi!
    Halt mær, tá tað fer at skýma,
    teska í tí síðsta tíma:
    Leiðin ber til Paradís!

    Í tonkum so djúpum eg stóð ein dag

    Orð: George Perry
    Lag: L. Morris
    Týtt: Øssur Berghamar

    1. Í tonkum so djúpum eg stóð ein dag
    við Genesarets strond – tí har
    var savnað ein fjøld um ein fremmandan,
    sum úr Galileu var.
    Eg sá, at Hann nam við ein blindan mann,
    sum brátt síggjandi fróur gekk;
    hin lamni, sum einsamur, bundin sat
    nýggja styrki í øklar fekk!

    Niðurlag: Á, eg kendi meg gripnan av Honum,
    Hans náði, Hans signaða brá.
    Hesum fremmanda úr Galileu
    gav eg hjarta mítt heilt júst tá.

    2. Hann talaði Orð, sum fekk bylgjurnar
    við eitt til at leggja seg.
    Hans myndugleiki fekk stormarnar
    at bráðtagna beinanveg!
    Í hond Hans eg legði mítt lív, mítt alt,
    tá Hann talaði til mín milt;
    hvør bylgja brátt legðist, hvørt boðabrot
    fyri Orðum Hans: Tig, ver stilt!

    3. Tann náði, sum andlit Hans lýsti av,
    eg ongantíð gloyma kann,
    tá eg í syndanna myrkri gekk
    og undurfult Hann meg fann.
    Eg eyga nú fekk á tey merkju djúp,
    Hann á hondum og fótum bar,
    mín Frelsari gjørdist hin fremmandi,
    Hann, sum úr Galileu var.

    Jesus vil leiða meg trygt gjøgnum dalin

    Orð og lag: Haldor Lillenas
    Týtt: Øssur Berghamar
    Upprunaheiti: Jesus will walk with me
    Onnur týðing

    1. Jesus vil leiða meg trygt gjøgnum dalin,
    varða mín fót um hvønn tind og hvørt skarð,
    hvat enn meg hendir – í sól sum í skugga –
    einki eg óttist, tá hann er mær nær.

    Niðurlag: Jesus vil leiða meg,
    hann vil varða meg,
    einki óttist eg.
    Á nátt sum á degi,
    í sorg sum í gleði
    eg veit, hann vil leiða meg.

    2. Jesus vil leiða meg – eri eg veikur,
    kraft hann mær gevur, sum tørva mær kann.
    Í hvørji kreppu eg tryggur kann vera,
    hildin av honum, sum sleppa ei kann.

    3. Jesus vil leiða meg – hann vil meg verja
    í hvørjum vanda og á hvørjum stað.
    Hann er mín kongur, mín kraft og mín klettur,
    hond hans meg leiðir, og sál mín er glað.

    4. Jesus vil leiða meg løturnar ljósar,
    og tá ið dagurin myrkastur er,
    leiða meg trygt, inntil stundin upp rennur,
    tá ið hann heim til sín sjálvan meg ber.

    Vit siga tær takk

    Orð og lag: Øssur Berghamar

    1. Sólgyltu ungdómsár – tú gjørdist vinur vár.
    Tú komst inn í várt lív og gjørdi alt nýtt,
    tókst okkum tætt at tær – aldri tín hond var fjar.
    Og av hjarta og sál vit syngja frítt.

    Niðurlag: Vit siga tær takk, góði Gud, fyri títt trúfesti,
    ta náði, sum tú hevur veitt okkum í Kristusi.
    Ta verju, tín hond hevur veitt,
    okkum borið, okkum leitt,
    og í tær vit eru eitt –
    vit siga tær takk!

    2. Takk fyri krossins stríð, takk fyri farnu tíð,
    at tín hond okkum helt, tó trúgvin var veik.
    Tá ið vár fótur gleið – vit komu burt av leið,
    tú vart trúgvur og aldri okkum sveik.

    3. Fram halda vit við tær – takk, at tú ert so nær,
    okkum fylgir um tind og grønan dal.
    Rødd tín, hon vísir veg – ein dag vit síggja teg
    í tí dýrd, sum í Himli verða skal.

    Kvirra um fjøll og fløtur

    Orð og lag: Øssur Berghamar
    Viðmerking: Yrktur í 1970.
    Norsk týðing

    1. Kvirra um fjøll og fløtur,
    og náttin døpur, myrk og svørt.
    Lýsir av fjallatindi
    stjørnan so blonk og bjørt.
    Rekur burt nátt og niða
    vill dýr um teigar tiga,
    stjørnan so spakuliga
    seg otar fram í náttini.

    Niðurlag: Føddur er konga Kongur
    til eina falna verð.
    Hoyr hvussu einglasongur
    boðini sælu ber.
    Ja, hoyr teir syngja um frið á foldum,
    tí Frelsarin nú føddur er.

    2. Rekur í nátt og niðu
    so mong ein friðleys sál í dag
    ljósið tó bjart úr erva
    skínur við sama lag,
    boðar á lívsins vegi
    sálunum frið og gleði.
    Leita á hesum degi
    til Hann sum kom at frelsa teg.

    Bert ein dag í senn

    Orð og lag: Marijohn Wilkin og Kris Kristofferson
    Týtt: Øssur Berghamar

    1. Einki eg megni í sjálvum mær
    kraft mín tú ert, hjálp tú mær bert
    at hvíla í tær.
    Kósina vís mær – og leið mína kenn!
    Gev mær tín frið, leið meg hvørt stig
    bert ein dag í senn!

    Niðurlag: Bert ein dag í senn, mín Jesus,
    er alt mær tørvar júst nú.
    At liva meg lær við styrki frá tær,
    mítt álit ert tú.
    Gjárdagurin fór, mín Jesus,
    í morgin ei komin er enn.
    Eg biði teg: vís mær tín veg,
    bert ein dag í senn!

    2. Sært tú tann ófrið, í heiminum er?
    Myrk hendan tíð – bardagi, stríð
    meg ótryggan ger.
    Men tú ert hin sami, ert virkandi enn.
    Eg líti á teg, vís mær tín veg
    bert ein dag í senn!