Sælir eru fátækir í anda

Orð: Mikkjal á Ryggi

1. Sælir eru fátækir í anda;
verða teir enn lítið virdir her.
Vilja teir í Harrans liði standa,
himmiríki teirra lutur er.

2. Sælir teir, ið tyngjast her av sorgum;
tykist heimsins lagna teimum svár,
meir teir skulu troystast annan morgun,
Jesus turkar burtur teirra tár.

3. Sælir teir, ið spakir, friðarligir,
tolinsintir taka semjuráð;
væl teim gangast má, tí Jesus sigur,
jørðina í arv teir skulu fá.

4. Sælir teir, ið hungra, tysta eftir
rættvísi og rættferð her á jørð;
troystast skulu teir og verða mettir,
har sum lok ei millum hveiti grør.

5. Sælir eru teir, sum miskunn vísa
hvørjum, sum her várkunn treingir til;
Harrans signing yvir teir skal lýsa,
himla faðir teim miskunna vil.

6. Sælir eru teir, við reinum hjarta
skýggja alt, av syndum dálkað er;
seinni skulu teir í ljósi bjarta
síggja Harran, sum teir søktu her.

7. Sælir eru teir, sum ei seg hevna,
doyva hat og stríð og elska frið;
himla Guð vil síni børn teir nevna.
Gævi vit øll finnast í tí lið’!

8. Sælir teir, ið her forfylgdir líða
fyri rættvísi og fyri Krist;
seinni teir til himmiríkis stíga,
har Guð gevur teimum innivist.

9. Sæl tit eru, sum teir óndu speia,
sum forfylgd við lygnum verða her;
gleðið tykkum, fegnist, tí tit eiga
mikla løn í faðirs himlaverð.

FavoriteLoadingGoym tekstin