Søkkur í havið nú setandi sól

Orð: Hans Dalsgaard
Lag: Sámal Petersen

1. Søkkur í havið nú setandi sól,
tjøldur í fjøruni kúra,
ansa ei litin um brandandi hól.
Hví munna tey sita og stúra?

2. Rísur tú upp aftur, setandi sól,
vilt tú úr havinum stíga?
Nær skal eg síggja tín glitrandi stól?
Tungt munna stundirnar líða.

3. Geislandi sól, tú drotningin dýr,
nær manst tú koma úr kavi?
Bert tú mær kvøðu frá vini, ið býr
fjart handan fjallið og havið?

FavoriteLoadingGoym tekstin